Halló krakkar!
Ég heiti Ýma og ég er tröllastelpa. Vitið þið
af hverju ég heiti Ýma? Ég var nefnd eftir
frænda mínum, jötninum Ými, sem sumir
segja að hafi skapað alheiminn. Einu sinni,
fyrir 300 árum þegar engir bílar voru til,
bjó ég í helli hátt uppi á fjöllum. En einn
daginn gerðist dálítið skelfilegt. Þið vitið
hvernig við tröll erum með ofnæmi fyrir sól
og ef við lendum í henni þá breytumst við í
stein. Jæja, svoleiðis kom fyrir mig! Ég var
svo ofsalega forvitin að sjá mannabörnin
leika sér að ég stalst út úr hellinum eina
nóttina. Ég hélt að ég hefði nægan tíma um
morguninn en áður en ég vissi af þá var sólin
komin upp. Mér fannst bara svo gaman að sjá
börnin leika sér að ég alveg steingleymdi mér.
Vitiði hvernig það er að vera steinn í 300 ár?
Ég veit það, en það eina sem ég vil segja er að
það er til skemmtilegra líf. Verst var að horfa
á allt þetta skemmtilega líf sem var að gerast
beint fyrir framan þig, eins og krakkar að leika
sér, fara í útilegur og á hestbak, og geta ekki
verið með. Púff, það var sko erfiður tími skal
ég segja ykkur.
Eina nóttina kom Vaka álfkona og leysti mig
úr álögum með því að strá töfradufti yfir mig.
Þegar ég lifnaði aftur við
bað hún mig að færa
heila álfabyggð því það
átti að byggja veg. Ég
hélt fyrst að ég þyrfti
að hlaupa um allt
með fullt af stórum
húsum en síðan
komst ég að því
að álfabyggðin var
öll í einum álfa
steini. Hann var
samt þungur! En
vegna þess að ég
er svo voðalega
sterk tröllastelpa
þá gat ég þetta
alveg.
Til þess að þakka mér fyrir dreifði Vaka
álfkona yfir mig öðruvísi dufti (það var
svona gult á meðan hitt var bleikara) og –
simsalabimm – ég hef ekki lengur ofnæmi
fyrir sólinni. Núna má ég vera úti á daginn
eins og ég vil og verð aldrei aftur að steini.
Vaka álfkona er ofsalega góð og ég fæ að
búa hjá henni. En ég þarf líka að fara í
skólann og í fyrra þurfti ég að læra allar
umferðarreglurnar til að komast þangað. Fullt
af krökkum hjálpuðu mér og áður en ég vissi
af kunni ég að fara
yfir gangbrautir, nota
endurskinsmerki og
bílbelti og kunni sko
alveg á græna karlinn
og rauða karlinn.
Núna er ég
búin að vera
í skólanum
og þótt það sé
gaman að læra
þá er líka stundum
svolítið erfitt.
4
